Diatu Sarawak Report udah mujur bulih sesalin jaku randau minggu nyin kemari entara Anwar Ibrahim enggau Adam Boulton, siku pengarang berita televisyen ke Sky TV. Jaku randau nya udah dikeluarka dalam salur televisyen Sky News Tonight, iya nya sebuah salur berita TV menua tasik ba jam 8:30 malam hari Empat 16 Oktober nyin kemari, beserimbai enggau penemuai kepala penyakal nya ke nengeri London.

Tang enda mukai-mukai Anwar Ibrahim enda tau enda ngemandakka jaku randau nya, nyengkaum jaku randau iya enggau stesyen berita BBC laban iya dikangauka pulai ke Malaysia ngena jaku notis ti pandak sereta serekat.

Endang udah ditemu diatu Kot Perintah Besai Malaysia ti mendingka pechara kes nya deka diatur kena 28 Oktober tu ila. Ba pun pechara tu suba Anwar udah ditemu enda salah udah bekau Kot Tinggi Malaysia nadai bulih sebarang penerang ti nyengala dikena nekanka tuai penyakal nya.

Tang enda mukai-mukai, udah bekau raban penyakal nya bulih pemenang pemadu mayuh undi popular, dia raban pendakwaraya perintah lalu ngenjung sebengkah apil dikena mantah akuital iya.

Pemutus Kot Apil udah mujur madamka pemutus Kot Tinggi dalam timpuh maya ti pandak bendar, iya nya setengah jam aja, ti meri arah ngagai tuai penyakal nya diukum tutup dalam pengelama 5 taun. Udah nya Anwar lalu nganjung apil dikena mantah pemutus nya ngagai Kot Tinggi.

Ba maya nya, bala pendakwaraya mega ngapil ngagai Kot Perintah Besai belalauka ketegal timpuh nutup Anwar nya kelalu pandak!

Enggau gaya homofobik pechara tu ti mega diseretaka enggau motivasyen bepolitik ti terang bendar nya udah nyungkang mayuh jaku tanya ari serata dunya ti lalu ngujungka pemanah nama Malaysia ti seruran ngumbai diri sebengkah menua Islam ti jelan sereta liberal sereta mentas.