Rintai skandal ti bekelingi ba duit turu ‘pemansang’ 1MDB di menua Malaysia diatu nyau majak panjai sepanjai.
Sehari tu, Tony Pua, siku kaban parlimen ari parti DAP udah mantaika sebengkah kenang media pasal duit jali ti dikena melanja duit turu bejuta-juta dollar tu, ti endur penyampau nya besai bendar udah lenyau sereta lesap enda ditemu kini penunga.
Perengka ti dikena nya sebuah kompeni ti benama SRC International Sdn. Bhd, ti ditumbuhka gerempung duit turu 1MDB ti udah nya diasuh ngulihka duit jali RM4 billion, ti enda udah tentu dijamin Perintah Besai Malaysia.
Tony Pua nuduhka penemu ngambika penyaru penemu ti bekelingi ba duit jali nya lalu mega enggau kurang penampak ba utai ti udah nyadi ba duit ti ngemayuh nya, dipeda nyadika sebengkah pekara dikena ngutuk 1MDB awakka mujuk bala tukang kira-kira dalam KPMG ngeluarka Akaun Taun sida ti tembu dalam bulan Tiga 2013 suba.
Udah nya KPMG matak diri ari pengawa sida nyadi tukang kira-kira ke 1MDB lalu udah nya sida diganti Deloittes, ti udah nuliska repot pasal akaun 2013 sida laun setaun ke pengawa dagang ngena duit turu bebillion-billion ringgit nya, ti bepengerusika menteri besai Najib Razak.
Kaban Parlimen ari parti DAP nya udah nunjukka ba maya tu SRC udah ninggalka 1MDB dan ditukar Opis Menteri Pekara Wang, ti diatu ‘beempu’ kompeni ti enda dikelala lalu duit jali ti diinjau sida nya dijamin perintah.
Penanggul besai iya nya nadai siku orang nemu utai ti udah nyadi ngagai duit jali RM4 billion nya, laban SRC Sdn Bhd lalu bedau ngayanka repot kira-kira sida ke taun 2013. Enda tekabih ngemataka pejalai pengawa kompeni orang mayuh?
Siti faktor selama ba pengawa belalai-belalai tu, munyi ti dikenang Tony Pua, iya nya Menteri Besai Najib Razak. Tambah mega Najib ti nyadi pengerusi dalam 1MDB ti udah ngelekaka kompeni SRC International lalu mega nyadi Menteri Pekara Wang Malaysia, ti udah ngambialih kompeni nya.
Berindik ba nya, iya patut nemu nyaut semua tanya ti dipansutka nya!
Tu mih kebuah Tony Pua betanya ngagai Najib Razak, tang iya semina, baka selama, nadai meri nama-nama saut.
Engka, munyi ti dituduhka bala pelukis kartun, Tony Pua patut ngalih lalu ngulihka saut ari Rosmah Mansor, bini Najib Razak empu.
Tambah mega Rosmah endang ditemu nyadika siti ulu lungga lalai entelah ti bisi kaul enggau pejalai duit turu 1MDB; ‘penyanding penemu’ iya, Jho Low; bala orang ti beranakka puku ba gerempung duit turu Aabar ari menua Abu Dhabi enggau kompeni pengeluar wayang Hollywood ti endang ditagaka ngulihka sukung bejuta-juta dollar ari 1MDB, Red Granite ti ngeluarka wayang Wolf of Wall Street, enggi anak iya empu, Riza Aziz.
Bini menteri Besai Malaysia nya enda patut serebanaka pasal jaku kenang bala orang mayuh ti munyi nya, laban terang bendar mayuh pengawa ti dikereja laki iya empu ngena duit turu nya.
Tuju ti bendar repot kira-kira taun ti menuku nya endang dikena nerangka baka ni chara semua duit dalam duit turu nya dipelanja ngena pengelurus.
Tang, laki iya, ti endang dikuasa iya, nyadika siku orang ti suah bendar belanggarka atur enggau undang-undang.
Tony Pua bisi kuasa enggau tanggungpengawa ngarika orang mayuh di Malaysia betanyaka pekara tu ngambika ditemu orang mayuh.
